Exo 36 | ZomZIV | STEP | Tua ahi ciangin Belzalel, Oholiab le mun siangtho lamna ah nasepna khempeuha kizang dinga TOPA in siamna le khutsiamna a piakte khempeuh in TOPA thupiaksa bang tektekin na a sem ding uh hi,” a ci hi.

Exodus 36

1 Tua ahi ciangin Belzalel, Oholiab le mun siangtho lamna ah nasepna khempeuha kizang dinga TOPA in siamna le khutsiamna a piakte khempeuh in TOPA thupiaksa bang tektekin na a sem ding uh hi,” a ci hi. ^a

2 Tua ciangin Bezalel, Oholiab le TOPA in khutsiamna a piaksa khutsiam mi peuhmah a pai nuamte pai-a a sep nadingun Moses in a sam hi. 3 Amaute in Moses tung panin, Israel-te in munsiangtho lam nadinga a piakte khempeuh a sang uh hi. Tua hi a mipite in utna tawh zingsang khat khit zingsang khat biakna a puakpuak lai uh hi. 4 Tua ciangin munsiangtho lamna-a sep ding khempeuh a sem khutsiam mi khempeuh in a nasep uh nusia uh a, 5 Moses kiangah, “TOPA in sep dinga a thupiakna nasep nadinga kisam zah sanga tamzaw mipite in hong puak uh hi,” a ci uh hi.

6 Tua ciangin Moses in, “Numei pasal kuamah in munsiangtho ading biakna bangmah piakbeh nawn kei un,” ci-in thu pia-a, amaute in tua thu giahphual sung khempeuhah a zasak uh hi. Tua hi a, tua ciangin mipite in adang a puak beh nawn loh nadingun kikham hi; 7 bang hang hiam cih leh amau neihkholhsate nasep nadinga kisam zah sangin a tamzaw hi.

Biakbuk

8 Nasem mite laka khutsiam mi khempeuh in hoihtaka kikhuk adum adupsan le a-ausan khau tawh khutsiamte in cherubim-a a zep uh puanzak sawmin biakbuk a bawl uh hi. 9 Puanzak khempeuh a kikim hi a - tong sawmnih le giat sau in tong li a zai ^{▼▼36.9 Tua pen, pi 42 bang (meter 12.5 bang) sau a, pi 6 (meter 1.8 bang) zai hi.} hi. 10 Amaute in tuate nga peh uh a, adang ngate zong tua mah bangin a hih uh hi. 11 Tua ciangin a kipehkhawm puanzak kop khatte nawl zui-ah adumin a bilte bawl uh a, tua mah bangin puanzak a kop dang penah zong a bawl uh hi. 12 Amaute in puanzak khatah a bil sawmnga zong bawl uh a, a kop khat pena a bil sawmnga mah tawh khat le khat a kigalsai dimdiam in a bawl uh hi. 13 Tua ciangin amaute in kham mekkilh sawmnga bawlin biakbuk bup khat a suah nadingin tuate zangin puanzak kop nihte a peh khawm uh hi.

14 Amaute in biakbuk tungkhum dingin keelmul tawh puanzakte bawl uh a - a vekin sawm le khat ahi hi. 15 Puanzak sawm le khatte kikim a - tong sawmthum sau-in tong li a za ^{▼▼36.15 Tua pen, pi 45 (meter 13.5 bang) sau a, pi 6 (meter 1.8 bang) zai hi.} hi. 16 Amaute in puanzakte nga ciangin kop khatin zom uh a, adang gukte a kop dang khatin a zom uh hi. 17 Tua ciangin amaute in puanzak kop khat mong gei zui-ah abil sawmnga bawl uh a, puanzak a kop khat pen mong gei zui-ah zong a bawl uh hi. 18 Amaute in puanbuk bup khat suahsak nadingin sumngo mekkilh sawmnga a bawl uh hi. 19 Tua ciangin amaute in puanbuk tung khuh nadingin asan-a kinim tuutal vun bawl uh a, tua tunga khuh sawn nadingin tuipi bawngpi ^{▼▼36.19 Tua in dugong-te} vun a bawl uh hi.

20 Amaute in biakbuk adingin singkha singin singpek kitungte a bawl uh hi. 21 Singpek khat tong sawm sau-in tong khat le alang ciat zai ^{▼▼36.21 Tua pen pi 15 (meter 4.5 bang) sau a, pi 24 (meter 0.7 bang )zai hi.} a, 22 a bulh nadingin singpek khatah a zang nih ta a nei hi. Amaute in biakbuk singpekte khempeuh a kibangin a bawl uh hi. 23 Amaute in biakbuk leitaw-lam panga dingin singpek sawmnih bawl uh a, 24 tuate nuai-a om ding ngun bullen sawmli -singpek khatah bullen nih ta -khuam zang khatah khat ciat a bawl uh hi. 25 Apang khat biakbuk leilu lampang adingin amaute in singpek sawmnih, 26 le ngun bullen sawmli - singpek khat nuai-ah nih ciat a bawl uh hi. 27 Amaute in a phaitam lam mong, tua pen biakbuk a nitumna-lam mongah singpek guk le 28 biakbuk a phaitam lam kiute adingin singpek nih a bawl uh hi. 29 Hih a kiu nihte ah a bula kipan a dawn dong nih hi a, sikkual khatin kihen khawm hi; a nih in a kibanga kibawl ahi hi. 30 Tua hi a, singpek giat le ngun bullen sawm le guk - singpek khat nuai-ah nih ta ahi hi.

31 Amaute in singkha-sing zawl: biakbuk pangkhata singpekte adingin nga; 32 apang langkhat adingin nga mah le a nitumna lam biakbuk a phaitam lam kiu-a singpekte adingin zong nga mah a bawl uh hi. 33 Amaute in singpekte kimtanah mong khat pan mong khat a tungsuak dingin a zawl laita a bawl uh hi. 34 Amaute in singpekte khamtui luan uh a, a zawlte khum nadingin kham kualte a bawl uh hi. Amaute in a zawlte zong khamtui a luan uh hi.

35 Amaute in hoihtaka kikhuk adum, adupsan le a-ausan khau tawh khutsiamte in Cherubim-a a zep uh puanzak a bawl uh hi. 36 Amaute in tua-a zat ding singkha sing li sui uh a, khamtui a luan uh hi. Amaute in tuate ading kham vankhaite bawl uh a, tuate ading ngun bullen li a sung uh hi. 37 Puanbuk lutna-a dingin amaute in adum, adupsan le a-ausan khau, hoihtaka kikhuka kigan puan tawh - khutkhui siampa khui-in a bawl uh hi; 38 amaute in tuate ading khuam nga a vankhaite tawh a bawl uh hi. Amaute in khuam dawnte le a gaknate khamtui luan uh a, a bullen ngate sumngo tawh a bawl uh hi.